هذي الابيات من عاشق الصحراء قالها يوم شاف حال وحده من نياق ابن عمه المرحوم عايد بن حامد بن سليمان النميري السميري
بعد وفاته باعو الابل ابناء اخوه و خلوها عندهم في هدمه و عافت الاكل
والشرب !!!
و بس تحن ، عودو جابوها و نزلوها عندنا في مرباها في مقرح السلم وحطوها بالشبك ، و يوم شافتني و عرفتني وعرفت السياره قامت تدرج الشبك و تحن
لاني انا اللي عسفتها للحلب
وعرفتني !
بمناسبه حنينها لما شافتني كتبت هذي الابيات
…
اليوم سوده تحن و تدرج الحنه === و تندب الشايب اللي كان مغليها
اللي يتحزم لها فالبرد و الكنه ===. وفي كل يوم يعلفها و يسقيها
و انا بعد شفتها جريت لي ونه === من حالها يوم شفت الهم طاويها
ياليت الايام يا الاجواد خلنه === حتى تضلي نياقه في مفاليها
لا شك الايام عن سودات شالنه == = و راحت قطايع لبايعها و شاريها
يا الله طلبتك عسى ملفاه للجنه ==يا خالق الخلق و انت المكتلف فيها
و يارب حسن الختام و يا الله الجنه ==و كل نفس ترى ان الموت قافيها

و لاتنسوا المرحوم عايد من دعواتكم الصالحه