الا واوجودي وجد عوداً بليا عيال = يحده زمانه والقرايب بعيديني
وساسه جويد ولا تمنا عصاه المال = وسود الليالي مع ظروفه معاويني
عجوزه كفيفه جالسه كنها تمثال = وحتى الحروف تبدل السين بالشيني
يقول إن لفيتك قلت بالخير كيف الحال = لقيتك مع ظروفي مريضه تونيني
وانا يافلانه مثل شجره بليا ظلال = وهمومي ليا نام السهارى تسريني
الوم الجمل بالدرب والعيب بالجمال = واشوف الحقيقه بس ماعاد يمديني
على اللي غيابه سم حالي بدون جدال =خطيراً من غيابه توقف شراييني
ليا غاب ليله في حسابي بعشر ليال = واقوم اتوجد واضرب يسار بيميني
لو إنه على كيفي ولااخشى من العذال= ولااخشى كلام مفرقين المحبيني
عباداً مهمتها مع الناس قيل وقال = اوادم ولكن بالفعايل شياطيني
لا احطه على يمناي كنه مدير أعمال = ولا أقبل منه لوساعه يغيب عن عيني
نجر الهواجس والهواجس عراض طوال = ونكتب ونمسح والنهايه عناويني
وتفهم كلام الشاعر العالم العقال = ولا هو مكلف في عقول المجانيني
وليا ضقت من دنياك عرج على الموال = وجر القوافي بين مسحوب وهجيني
وإذا ماانت شاعر عد رجلك برجماً عال = وتذكر ترى عمر الفتى مجرد سنيني