منتدى قبيلة السمره من جهينة الرسمي - الى منتداى الغالى تقرير عن رحلتي من السعوديه الى الولايات المتحده الامريكيه

السلام عليكم ورحمه الله وبركاته

ومساكم الله بالخير

انا الله يسلمكم مرافق مع زوجتي وبعد بكمل دراسه البكالوريوس وزوجتى بتكمل الماجستير ان شاء الله .؟

على برنامج خادم الحرمين الشريفين لللأبتعاث الخارجي ؟ للمرحله السابعه

كانت رحلتي يوم الثلاثاء الموافق 10/10/1433هـ 28/ 9/2012 م

على الخطوط الملكيه الأردنيه .

وكان سير الرحله من مطار المدينه المنورة الى الاردن الى شكاغو ثم اخيرا الى مقر دراستنا بولايه كلورادو مدينه دنفر

وكانت الرحله طويله جدا كانت من مطار المدينه الى مطار الاردن ساعتين وجلسنا في مطار الاردن ساعتين ونصف وبعد ضيعت بنتي في المطار الله يصلحها عمرها سنه وثمانيه اشهر ولا تحب تجلس بس تحب تخرب مأدري هي طالعه على مين :D وكانت بالنسبه لنا حلوه لكن كانت من مطار الاردن الى مطار شيكاغو 14 ساعه واغلب اللى بالطياره من اخواننا العرب من الجنسيه المصريه والعراقيه والفلسطينيه وقله من الامريكان المهم المهم بعد 14 ساعه الحمدالله وصلنا مطار شكاغو بالولايات المتحده الامريكيه وكان تعب وقلق ولا نوم زين الله يعين بالذات اللى معه اطفال وقبل لا انزل بشويه من الطياره الا ذيك الحرمه الفلسطينيه تقول لنا وين رايحين قلت لها رايحين يم دنفر قالت حتي انا رايحه الى دنفر زياره الى ابنائي .
قلت ماشاء الله قالت لنا ياله انا استناكم قلت طيب . وقاعد اقوول لزوجتي وش ذالبلشه مع الحرمه . وتاخرت شويه بالطياره على بال اخرج عفشي والله اللى يشوف شنطنا يقول هذولي يبون يهاجرون مايبون يرجعون السعوديه :D بس اكثرها اغراض بنتي :p المهم طلعت من الطياره ولا لقيت الحرمه الفلسطينيه وقلت لزوجتي فكه منها .ورحت داخل يم صالة الدخول من شان يختمون لنا على الجوازات وكانت زحمه بس بصراحه كانو محترمين الموظفين وبعد التختيم دخلنا يم تفتيش الاغراض اللى كانت معنا . رحنا نستلم الشنط واستلمت الشنط لكن عربيتين لبنتي مالقيتها وجلست ساعه احوس ادور واقول لامريكيين لكن حسافه ماحد يفهم على ههههههههههههههههه وقالت لى المدام خلنا نمشي الله يعوض علينا لا تفوتنا الرحله المهم بدخل صاله كبيره لا ذاك الامريكي موظف يتكلم عربي وقلت له لوسمحت قال هلا قلت انا مالقيت عربيتين لبنتي قال تعال معايه ورحنا ندور بقسم ثاني بالمطار وبعد مالقينها وقلت له انت تتكلم عربي هل انت من اصول عربيه قال انا اصلي مغربي قلت له ماشاء الله . المهم قلت لها ودينا يم الحجوزات وماقصر الرجال وصلنا يم مكتب الحجوزات بالمطاروحجزنا على مطار كلورادو . بصراحه كانت مطار شكاغو كبير جدا .؟

ورحت ابحث عن الموقع الخاص بالخطوط الذاهبه الى ولايه كلورادو وضيعت والله حاله وبالصدفه اشوف ذاك الولد اللى بالثوب السعودي واتعرف عليه واسلم عليه واقول له انا ادور رقم البواب F1B وماقصر الرجال دلني عليها .

وكان كل اللى بالصاله امريكان الا انا وزوجتي وبعد مستغربين منا من شان زوجتي متنقبه وكانو جدا يحبون الاطفال انبسطو من بنتي قاعده تقول لهم ( وجع ) وهم يضحكون مايدرون وش تقول . واقول لزوجتي شفتي وين الفلسطينيه اللى كانت تقول لنا انها رايحه لمدينه دنفر . شفتي اشلون ضحكت عليها :) المهم بعد نصف ساعه يعلنون عن الرحله وطلعون الركاب واسال ذاك الامريكي واعطيه التذكره اقول له شوف متي رحلتي قالى GO GO هههههه اخلعني اثريه يقولى لحق روح الناس اللى طلعو راحين يم كلورادو وشلت اغراضي وطلعنا الطائرة وبعد ساعتين ونصف وصلنا مطار كلورادو وكان هادي جدا جدا وبعد صغير ومابه عرب غير احنا وتقولى زوجتي

حسب ماسمعت انو مطار دنفر كبير ماتوقعت انه كذا المهم واتصل على شخص سعودي تعرفت عليه قبل لا اسافر يقيم هو وعائلته بنفس المدينه اللى انا ذاهب لها وقلت له انا ابشرك وصلت مطار دنفر قال نصف ساعه
واكون عندك قلت اوكيه المهم مرت ثلاث ساعات وماوصل ... وبعد شويه قالي اقولك خلي اى احد جنبك امريكي يكلمني وكلمه عسكري امريكي موظف بالمطار .وبعد شويه كلمني السعوديه يضحك هههههههههههههههه
قاااااال سلامت انت وشفيك قلت له ليش قال انت منت بالمطار اللى في دنفر انت في مطار ثاني بمدينه ثانيه تبعد عنا 150 كيلو قلت له وش السواه وكانت الساعه 2ونصف الفجر قالي انا بجيك ساعه ونصف بكون عندك ان شاء الله بصراحه والله ماقصر هالرجل وبعد انه من ربعنا (( جهني )) . وكان الغلط منى كنت المفروض احجز على دنفر مو على كلورادو وقاعد اقوول لزوجتي هذا كله من شان الفلسطينيه يوم ظلمتها هههههههههههههههه المهم بعد ساعه ونصف واصل ذالك الرجال وقال انت فلان وسلمت عليه وقاعد يضحك وطلعنا معها بسيارته وحملنا شنطنا وصلنا مدينه دنفر بسلامه واستاجرت ليه غرفه بالفندق على بال صديقي يبي يستاجر ليه شقه بالنفس المجمع اللى هو ساكن فيه . وان شاء الله تبداء عندنا الدراسه لغه لمدة سنه من السبت ان شاء الله وبعد اللغة اذا اتقناه واجتزنا الاختبار التوفل يبدا التخصص وكانت هاذي مختصر عن رحلتي .؟ وسلامتكم واعذروني على الاخطاء الاملائيه ؟

علما ان عندنا الحين الساعه 5 العصر .

وبالسعوديه الحين عندكم 2 صباحا