ياناشدن عني تهيض طواريــــــــــــك *** يومن تنشد تسأل الناس وينـــــــــه

أقلط على صفراًبوجهي لقهويـــــــــك *** من دلة فنجالها حايفينــــــــــــــــــه

ماعدها بالدرب هندي أبو كشيـــــــك *** ولامدها يبغى بها زود زينـــــــــــــه

ماغير ينظر سوقها من مخابيــــــــك *** زرقاً عليها كنقنا راسمينـــــــــــــــه

اللاش ماتفداه يعل يفديــــــــــــــــــــك *** لأنه رخص وإنت ياخالد ثمينــــــــه

وأسمع تراني بأنصحك ثم أوصيــــك *** كانك لبيب من القروم الفطينـــــــــه

لاتلحق الغياب تذهب حسانيـــــــــــك *** كم عابداًصلى وفلس خزينـــــــــــــه

وهرجاًورى المقفي طبوع الصعاليك *** ولاالرجل تاخذ حقوقه يمينــــــــــــه

إحذر مجالسهم وزين ملافيــــــــــــك *** من قبل لاتبدي عليك الضغينـــــــــه

والعايمه حذرى تبيح بخافيـــــــــــــك *** جنب لها تلقى معاريض شينــــــــــه

كم عاقلاً جرته وسط الشرابيـــــــــك *** ولعلوم ماتافق رجالاً رزينـــــــــــــه

وإن كانها من واحداً جات تعنيــــــك *** الطاق طاقيناً ترده بحينـــــــــــــــــــه

لا تحتري بعدين ماعاد يمديـــــــــــك *** من يقضي الديان لا راح دينـــــــــــه

وكثر السناوي لاتجي في مباديـــــك *** نجاد لابده مايلحق خمينــــــــــــــــــه

وأبعد عن النمام مبداه تشكيـــــــــك *** بعدين يلفك في حبال متينـــــــــــــــه

وتصبح على ماقال لاذي ولاذيـــــك *** الناس كارهتك وهم كارهينــــــــــــه

والمصطفى قوله عن القول يغنيــك *** إن كان تبغي الهدي من مو ثقينـــــه

وختامها لمن كتبكي وقاريــــــــــــك *** صلوا على نور القلوب الحزينـــــــه