يا بارق(ن) يزهي الخيال براقه=تسمع ازيز الرعد مع لوحة بروقه
لك يامزون الحيا مخلوق مشتاقه=فيه بدوي(ن) يخيلك واحترق شوقه
يالله بامرك يسير وانت خلاقه=للديره الظامية ياخالقي سوقه
ياليتني عارف(ن)صوبه ومطراقه=لروح يمه واخيله واتبع طروقه
من قال بسم الله افلح ما انعثر ساقه=وانا توكلت والله ما اترك حقوقه
واللي ترك واجبه رجليه منعاقه=لامن مشى الدرب كل معارض يعوقه
والرجل بالدرب منعاجه وسباقه=رجل(ن)تجي سابقة ما جات مسبوقه
وعلى الدروب النقية تبذل الطاقه=وكل(ن)حسب وقفته يخبرك منطوقه
ماشي دروب الشرف ما بعثر اوراقه=لنه ورد عد صدر مسقي(ن) نوقه
والشوق بين الاحبة حط ميثاقه=هذي سوالف عن المخلوق موثوقه
واللي ذبحني تعذر لي عن الباقه=والموت من يعرف ان الحب بعروقه
قال ابتعد والدموع سيول سباقه=على خدودي من الاعيان مدفوقه
ويالله بعد المغيب تعجل اشراقه=وتبشر القلب في قربه على ذوقه