قصيدة رائعة

وين انت ياطالب من الناس حاجتك
وينك عن الخالق سريع الاجابه

هو عالم بحالك وهمك وضيقتك
ولا رد مخلوقآ وقف عند. بابه

واوصيك مع مولاك وثق علاقتك
ولاخاب منهو يستجير بجنابه

من غيره. الي يفرج اليوم كربتك
ومن لاذ باالمعبود يجبر مصابه

ولا يمكن يحملك من فوق طاقتك
كلامه. الي. نزله. في. كتابه

ولالك عن المقسوم ياغير قسمتك
حتى ولو تهرف هريف الذيابه

يارب حنا كلنا. تحت رحمتك
نرجوك وانت الي اليك الانابه

نسألك. يارب السموات جنتك
ونعوذ به رب البشر. من عذابه

وياالادمي قدام تطوى صحيفتك
عليك في نهج النبي والصحابه

وصل الصلاه وناج ربك بسجدتك
وادعه وعفر جبهتك في ترابه

مادمت حي اعمل وزد بطاعتك
قدام باب الاجر ينصك بابه

العمر فرصه واغتنم فيه فرصتك
اعمل عمل صالح وتلقى ثوابه

والله ماينفعك ياكود حسنتك
والكاسب الي نالها. في شبابه

واوصيك بامآ ياابيض الوجه ربتك
في برها تأمن من الله عقابه

من حبها لو غبت تحسب لغيبتك
ماودها الواحد يطول غيابه

وشوف اليتيم ان كان دنياك غرتك
من يصنع اكله من يغسل ثيابه

وابوك بعد الله مصدر. لقوتك
يكدح. على شانك ويتعب ركابه

من هيبته تلقى مع الناس هيبتك
وانته تشيل اسمه وتحفظ جنابه

والدين هو مصدر شموخك وعزتك
والا. قليل الدين ما له مهابه

وخل النبي دايم. مثالك وقدوتك
ولا خاب منهو باالحياه اقتداء به

ولاتقطع ارحامك واصل قرابتك
طول العمر والرزق وصل القرابه

ماتدري ان الموت يمكن يباغتك
في وقت ضيق ماانت حاسب حسابه

وجهز لمن يسألك باالقبر إجابتك
سؤال لابدك محضر جوابه

هاذي نصايح سقتها من محبتك
عن كل ناصح سقتها باالنيابه

الشاعر /
عبدالرحمن معوض السميري الجهني

سبحان الله وبحمده سبحان الله العظيم