ابيات من روعة البر

لاضاق صدري طلعت لطارف الديره
وياكثر في ها الزمن من ضيقة البالي
البر احبه ولاابغى ديرة غيره
فيه اتونس لواني جالس لحالي
لاصارت ارضه ربيع وزان تخضيره
والعشب بالأرض جاب الواطي العالي
ياما حلا فيه لفه ثم تدويره
ومعك مهيل وتأخد منه فنجالي
وتولع النار لاما تشتعل نيره
وبالجمر يازين حوف المر والحالي
مع خوة اللي لهم بالمرجله سيره
اهل الوفاء اللي لهم يالمجد منزالي
تأخذ سويعات فيها الخير والخيره
اخير من هرجة اهل القيل والقالي
ويامحلا الجيب لازانت معاييره
يازين شكله لادوّج بالخلا الخالي
مع السهاسيه يطرب صوت تغييره
لاغيّر الأول وناول له التالي
يوم ان بعض العرب تكثر معاذيره
الجيب خله خويا لك ولاتبالي
ويالله عسى الأمر يسره قبل تعسيره
ياوالي الكون وانت اللي لنا والي
اقولها من هجوسا زان تعبيره
يأخذ من الشعر من جزلات الأمثالي

صح لسانك أبو مسلم
والله يازين شبة النار تونس لو أنك لحالك
يعطيك العافيه ...

ابيات رائعه
تقديري لك

ابو مسلم

سلمت يمنك وصح لسانك قصيدة رائعة بكل معانيها

وتعبر عن حياة البادية الاصيله وكرم الخصال

وشبة النار والقهوة العربية

نشكر كم على القصيدة الرائعة

صح لسانك يا أبو مسلم على القصيده الجزله

صح لسانك ابو مسلم على هذه القصيده الرائعه

أبيات جميله تدل على شاعرية قائلها
ننتظر المزيد

صح لسانك ومشكووووووووووووووووووووور