ياقوة الله

حظي قفص واحلام عمري عصافير **الدرب عتمه والاماني ضريره

جزعت من شوف الهقاوي معاثير**وازريت في جبر العظام الكسيره

انكرت ذاتي في زمان وبشر غير**امنين ما وجهت الانظار حيره

خلا الامل من كل حس وتعابير**الا انكسار العز في وجه اسيره

ياقوة الله ياانعقاد الاسارير**والضيقه اللي مالها انفاس اخيره

الحزن عيلم وانطوا الصدر له بير**وحبال صوتي دلوها فيه خيره

لولا اني اجذب ونتي صبح وعصير**فجعت كل الناس في كل ديره

يحز في نفسي رماد المناعير**اللي طفا جمره وله قبل نيره

واللي صرم زرع الثقه والتباشير**لمعة سنون ملونين السريره

جدب الحيا ف وجيهها والمحاذير**فكت عليها الريق من دون غيره

غروب بهجة خاطري فيه تفسير**فقدان يعقوب لضناه ونظيره

سئمت عيشً فيه للروح تزوير**وكذبة ياطعم اللقمه اللي مريره

الفقر فقر الدين ولا الدنانير**كم نفس تملكها وتبقى فقيره

هالوقت حدتني عليه المقادير**الود ودي عشت في وقت غيره

مماراق لي