قصة وقصيدة عن العقوق جداً رائعة

هناك اب كبير السن عاش طويلاً فرى الاهمال والعقوق من اولاده فاغضبه ذلك فدعا عليهم وهجاهم بدون مقدمات فالقصيده تتحدث عن نفسه

قال الذي يقراء بليى مكاتيب يالي تقرون العمى من عناكم
يعيالي يالي تشرفون المراقيب تريضوا لي وقصروا من خطاكم
خوذوا كلام الصدق مابه تكاذيب مثل السند مضمون للي وراكم
يعيالي لاصرتوا ضيوف ومعازيب ترى الكلام الزين ملحة قراكم
ترى السبابه من كبار العذاريب وهرج البلايس مايطول لحاكم
المذهب الطيب فهو مذهب الطيب والمذهب الخايب يبور نساكم
ياعيال ماسرحتكم باللواهيب ياعيال ماعمر المعزب ولاكم
ياما توليت القبايل تقل ذيب من خوف لاينقص عليكم عشاكم
وياما شريت السمن من عرض ماجيب ويفز قلبي يوم يبكي حداكم
ياما قطعة من الفيافي العباعيب اجيب من صيد البراري غذاكم
يعيالي دوكم لحيتي كلها شيب هذا زمان قعودنا في ذراكم
قمت اتوكا فوق عوج المصاليب قصرت خطانا يوم طالت خطاكم
عطوني القرضه عليكم مطاليب عطوني القرضه جزاء من جزاكم
لابد يوما عاوي دوني الذيب بالقبر ما أفرق طيبكم من رداكم
ماني بفاضحكم بوسط الاجانيب باعمالكم يدرون كل اقرباكم
لوكان تدرون الردى والمعاييب صرتوا مع المخلوق مثل خوياكم
خوالكم بالطيب تروي المغاليب ولو تتبعون الجد محدً شناكم
وش علمكم ياتاركين المواجيب حسبي عليكم الردى وين جاكم
ياالله عسى اعماركم شمسها تغيب ويعتم قمركم ثم تظلم سماكم
لعلكم في حاميات اللواهيب يالي على الوالد خبيث لغاكم
شفت الجفاء والحيف والغلب والريب بضلوعكم لابيض الله قراكم
اخسو خسيتو ياكبار اللغابيب اهبو هبيتو يقطع الله نماكم

وانتهت القصيدة بدعوة الوالد اعذنا الله واياكم من العقوق
وقد قيل ان اعيال الشايب لم يرزقو باطفال بسبب هذا العقوق