إجابه متمرده

(إجابه متمرده)

السوال يقول من حدد ملامح يا اجابه === يربحك وان كان ماحدد ملامح لك ربحتي
جمعي كل الوجيه اللي بها وجــهك تشابه === وعلميها كم وكم من شانها قمتي وطـــحتي
وانك العزوه على همآ على هم اعتزابه === الفرح في جيتك ولا العنا بك كان رحـــــــتي
وحسبي للي تقولينه وعيدي في حسابه === يستريح اكبر سؤال من السؤال اللي طرحتي
وعلمي من دق باب الدور قبل يدق بابه === ماعليه الا التعب لو دق عمرك مافتحتي
وعلمي حضرة جناب البيه وش حضرة جنابه === علميه يدق ثم يقول لحظه لو سمحتي
لو بدا يطرد سرابك تطردينه من سرابه === واعرف انك ناجحه في درس فيه اول نجحتي
لوتعزين المصاب يزيد طعنك في صوابه === ما اختلف تاثير طعنك جد لي ولا مزحتي
تشبع طيورآ تحوم وتنتظر صيـــد الذيابه === مرحبا بك يافرس فكري علي خيله جمحتي

أخوكم / عبيد السميري
شاعر ملوك العقيده