نصيحه

يابو حمد ياحر ياصقر ياذيب
.................يانمر باللقوات توجع ذراعــــه
سمعتك مثل التاج عند الاجانيب
................يرفع بها راسك وروس الجماعه
مافيه شخص الاتجيه عذاريب
................وعيبك يقع زود الكرم والشجاعه
لاتصاحب اللي صحبته شك مع ريب
.................صحبت مثل هالنوع ماهي طماعه
احذر من الضحكه وبعض الاساليب
.................كم تاجرا يضحك لبيع البضاعـــه
لاتنخدع في كثر زين التراحيب
..................كم ضحكتا حلوه وراها لكاعـــه
اترك ردي الحظ تعبان مايطيب
..................عنه الحيا قفا ورفـــع شراعـــه
منحي عن الزينه ومبعد عن الطيب
.................واما على الشينه سريع اندفاعـه
من لستحى ويش ضن عقلك يبي يجيب
.................غير العلوم الناكسه والصياعـــه
اليا فهمت الوضع شفت التعاجيب
.................واليا بحلت انظر وشوف اجتماعه
بالكل منهم ماتفيد الاطابيب
.................مضيعين حقـــوق راع الوداعـــه
عرفك لمثله عيب واكثر من العيب
.................وحتى كلامه عيب منك استماعه
كل الاوادم تخطي احيان وتصيب
................وغلطه من العاقل تزود بشناعه
من لايقص الدرب قبل التناشيب
.................يطيح في جرفا خطير إنهلاعــه
افهم ترى الشيطان يرسل مناديب
..............ويصنع لمن طاعه مشاكل صناعه
جنب ليا ماغثبرن المشاريب
..............لاتنتظــر لما تجـــي وسط قاعــــه
بعدين ماهي بالهوا طحت ياشعيب
..............ويبين وجـــه المدرق في قناعــه
عدوكم يفرح بشذب العراقيب
.............علمــا يضرك لاسمع فيــه ذاعــه
لكن ابتعد من قبل حر اللواهيب
.............لوعشت في دار الخلا والمجاعـه
اخير من عرفت ردي الاصاحيب
..............مافيه غيـر المنذله والوجاعــــه
النفس دربها على الخير تدريب
.............امش بطريق اللي لزوم إتباعـــه
عن مايريب النفس دور مجانيب
............مع خط واضح والمسالك وساعه
في صحبت اللي يفهمون المواجيب
.............بنفوسهم عن كـل شينـه مناعـــه
أفخر بصحبت ناس يعرف بها الطيب
............وحقا عليــك اللـي يراعيك راعــه
ومن لايحوز النعم من قبل لايشيب
............لاشاب راسه راح منها قطاعــــــه
ومن رافق الخايب مع الوقت بيخيب
............لوقال انا عنتــر مع الوقت طاعــه
والصقرلوخاوا الدجاج المكاهيب
...........ترك طبوعــه وأندمج مع أطباعـــه
ماعاد يبغى له جناح ومخاليب
............يعيـــش مع ديك الدجــاج بقناعـــه
يعذر من العليا وروس المراقيب
............يقصر عن العليا بطرفــه وباعـــه
هذا دليل موضح بالتجاريب
.............ان النزول اسهل مــن الارتفاعـه
باحر مركازه بعال المناصيب
............وقلبه على العليا تصيبــه ولاعـــه
اقبل نصيحت شخص مايدعي الغيب
.............يضنكم بالخير فــي كــل ساعــــــه
لاشي له عندك ولاله مطاليب
..............الايحب النــور يظـــــهر شعاعــه
يهذب المعنى مع القاف تهذيب
..............وقافه بسوق القاف غالي مباعه
وصلوا عدد ماتطلع الشمس وتغيب
...............على نبي الخلق راع الشفاعـــه

الشاعر سليم لافي العرفي

يعطيك العافيه اخوي ابو طارق على النقل وصح لسان الشاعر سليم العرفي

قصيده قمه في النصح والارشاد والذي ادهشني في هاذي القصيده أسلوب الشاعر بألتزامه بالهدي النبوي بالنصح والارشاد في مطلع القصيده حيث قدم الثناء لشخص المراد نصحه قبل النصيحه مما يدل على وعي الشاعر أضف على هذا تمكن الشاعر من أدواته الشعريه . فقد أعجبني الكثير من الابيات في هاذهي القصيده مثل قول الشاعر سليم لافي(.والصقر لوخاوا الدجاج المكاهيب***ترك طبوعه واندمج مع طباعه) فاذكرني ببيت من قصيده لبركات الشريف وهوا ينصح ابنه مالك.
( والحـر مثلك يسـتحي يصحب الديك = وإن صا حبه عاعا معاعات الادياك) حقيقه اخي ابوطارق يطول الحديث عن هاذي القصيده لو حاولنا التوقف عند كل بيت فيها. ولاكن لايسعني ألا ان أشكرك على هاذا ألاثرا الجميل . تذكر أنا لك متابعون فارجع علينا بمثل هاذهي ألاطلالات..

الله يعطيك العافية
قصيدة رائعة صح لسان قايلها وسلمت يد ناقلها

يعطيك الف عافيه اخي ابوطارق على نقل قصيدة الشاعر سليم لافي العرفي وصح لسانه على هذه القصيده الجزله
التي تحمل معاني ومفردات جميله اعجبتني طريقة النصح فيها والصور الشعريه الرائعه
وفيها البيت الي يقول
احذر من الضحكه وبعض الاساليب
.................كم تاجرا يضحك لبيع البضاعـــه
صح لسان الشاعر مره اخرى وسلمت يد من نقلها
ونتمنى منك اخي المزيد من جديدك
فلا تحرمنا
تحياتي لك

اخي ابو طارق
نشكرك على نقل قصيدة الشاعر / سليم لافى العرفي
هذه القصيده المفيده والتى تحمل الكثير من الفوائد من نصح وارشاد وحكمه
ابو طارق ايضا صاحب قصائد جميله ونتمنى ان يشاركنا ويفيدنا باشعاره الرائعه
ونتطلع الى جديدك القادم ونعتبر هذه حلقه من سلسله من القصائد
التى تحتفظ بها .
ودمت اخي العزيز ابو طارق ودام عطائك

الله يعطيك العافيه ياابوطارق على نقل قصيدة الشاعر سليم لافي العرفي وصح لسان الشاعر
قصيده جزله وتحمل معاني جميله
نتمنى منك اخي المزيد من جديدك

صـح لسآن شآعرنآ وسلمـت يمين نآقلهآ ...

نصآإئـِح رآئع ـه / لآتحرمنآ آخي من جديدك

ربي يع ـطيك الع ـآفيـه ..

تحيآتـي لـ/شخصك